د کانونو په سکتور کې د مدني ټولنې له فعالانو او پانګوالو سره مشورتي ناسته
د کانونو په برخه کې د اسانتیاوو او پانګونې په اړه د یاد وزارت د مدني ټولنې آمر او ویاند مفتي عصمت الله برهان د مدني ټولنې له فعالانو او د خصوصي سکټور له پانګوالو سره د کانونو وزارت د فعالیتونو په اړه د معلوماتو ورکولو لپاره د يکشنبې په ورځ د 15/8/1401 نېټې د وزارت په مقام کې ناسته تر سره کړه. په دغه ناسته کې د افغانستان په کانونو کې د لا زیاتو پانګوالو د هڅونې، د کانونو د ناقانونه استخراج د مخنیوي او د قیمتي ډبرو د صادراتو لپاره د مناسبو بازارونو د موندلو په اړه بحث وشو. د مدني ټولنې فعالان او پانګوال د شته فرصتونو په پام کې نیولو سره او همدارنګه د کانونو او پټرولیم وزارت د فعالیتونو او دندو او په ټولنه کې د هغې د اقتصادي ارزښت د اهمیت په اړه د پوهاوي سیمینارونو په جوړولو او پلي کولو کې د همکارۍ ژمنه وکړه. غونډه د کانونو د ناقانونه کیندنو او د هغو د زیانونو په اړه د معلومات په ورکولو او د ګډونوالو پوښتنو ته په ځواب ویلو سره پای ته ورسیده.
