د کانونو او پټرولیم وزیر د دلتا انټرنیشنل کمپنۍ له اجراییوي رئیس سره وکتل
د کانونو او پټرولیم وزیر الحاج ملا هدایت الله بدري د پنجشنبې په ورځ د ۱۴۰۴ لمریزکال د لړم میاشتې په ۱ نېټې په خپل کاري دفتر کې د سعودي عربستان دلتا انټرنیشنل کمپنۍ له اجراییوي رئیس شاهر التقي او د کام انرژي رئیس زمري کامګار سره وکتل.
په دې لیدنه کې د یادې کمپنۍ اجراییوي رئیس د خپلې کمپنۍ په اړه معلومات وړاندې کړل او دغه راز یې د افغانستان د نفتو او ګازو په برخه کې د پانګونې سربېره یې د ټاپي نللیکې د غځولو په برخه کې د پانګونې په موخه خپله لېوالتیا څرګنده کړه نوموړي ژمنه وکړه چې دوی به د افغان انجنیرانو سره خپلې تجربې شریکې کړي.
د کانونو او پټرولیم وزیر ورته ښه راغلاست ووایه او د افغانستان د نفتو زېرمو په اړه یې ورسره معلومات شریک کړل ښاغلي وزیر صاحب وویل موږ غواړو چې د سعودي عربستان پانګوالو سره په ګډه کار وکړو دا زموږ لپاره ویاړ دی، چې تاسو لېوالتیا لرئ تر څو د افغانستان په کاني زېرمو کې پانګونه وکړئ موږ پراخه بډایه کاني سرچینې لرو، ټول بهرني او کورني پانګوال کولای شي پانګونه وکړي زه ستاسو د لېوالتیا هرکلی کوم او د کانونو د قانون او کړنلارې اړوند به په یادو برخو کې درسره همکاري وکړو.
په پای کې دواړو لورو د تخنیکي ټیمونه د غونډو د دوام په موخه یادښت لاسلیک کړ.
