د کانونو او پټرولیم وزارت سرپرست د ننګرهار له والي سره وکتل

د کانونو او پټرولیم وزارت سرپرست الحاج ملا هدایت الله بدري د دوشنبې په ورځ د 8/5/1403 نېټې د ننګرهار له والي ښاغلي الحاج ګل محمد سره په خپل کاري دفتر کې وکتل.

په دې کتنه کې د ننګرهار والي د یاد ولایت د کانونو استخراج په برخه کې د روڼتیا او غوره مدیریت له کبله خوښي څرګنده کړه، د قاچاق او غیرقانوني کیندنو د مخنیوي په برخه کې یې د همکارۍ ډاډ ورکړ او د دغه ولایت د خلکو وړاندیزونه، ستونزې یې د وزارت له سرپرست سره شریکې کړې او په ننګرهار ولایت کې د کاني زېرمو د پروژو د پلي کېدو په برخه کې د وزارت له مشرتابه څخه د لا زیاتې پاملرنې غوښتنه وکړه.

د کانونو او پټرولیم وزارت سرپرست ننګرهار والي ته ډاډ ورکړ، چې د شته امکاناتو په شتون کې به د دغه ولایت د خلکو ستونزو ته رسېدنه وشي.