د کانونو او پټرولیم وزارت سرپرست د آفچین کمپنۍ له مشرتابه سره وکتل
د کانونو او پټرولیم وزارت سرپرست شیخ الحدیث شهاب الدین دلاور د افچین کمپنۍ له مسوولینو سره په کتنه کې د یادې کمپنۍ د وروستیو پرمختګونو او فعالیتونو په اړه بحث او نظرونه شریک کړل، د کارونو د چټکتیا او ښه والي په موخه یې د هغوی غوښتنې او ستونزې واورېدې، د ستونزو د هواري او نورو اړوندو برخو ته د رسېدو په موخه یې هغوی ته ډاډ ور کړ.
دغه راز په دې غونډه کې د افچین قراردادي شرکت له خوا د امو دریا نفتي حوزې د قرارداد اړوندو سیمو ته د اړتیا وړ ۱۵۰ ټنه ډیزل تېلو، چې ۱۲۰ ټنه یې د قشقري او انګوت او ۳۰ ټنه نور د زمردسای سیمې اړوند دي، د افچین کمپنۍ د با صلاحیته مسؤلینو په شتون کې یې د یوې رڼې پروسې په ترڅ کې آفرګشایي ترسره شوه.
په پایله کې د افغانستان د نفتو او ګازو دولتي شرکت د مناسبې بیې په وړاندې کولو سره د ګټونکي په توګه اعلان شو.
په پای کې د کانونو او پټرولیم وزارت سرپرست پر روڼتیا، د ژمنو سره سم د ټولنیزو خدمتونو پر پلي کېدو او د دغه ولایت ځوانانو ته د کاري فرصتونو په رامنځته کولو ټینګار وکړ.
