د کانونو او پټرولیم وزارت د پالیسۍ او برنامو مرستیال د ایران له سفیر سره وکتل
د کانونو او پټرولیم وزارت د پالیسۍ او برنامو مرستیال ښاغلي عبدالرحمن قانت د ۱۴۰۵ لمریز کال د غبرګولي میاشتې په ۲۱مه نېټه د پنجشنبې په ورځ د ایران اسلامي جمهوریت له سفیر ښاغلي عليرضا بېکدلي سره په خپل کاري دفتر کې وکتل.
په دې لیدنه کې دواړو لورو د تخنیکي او اقتصادي همکاریو د پراختیا، د دوه اړخیزو اړیکو د پیاوړتیا او په ځانګړي ډول د افغانستان د کانونو په اکتشاف، استخراج او پانګونې برخو کې د همکاریو پر زیاتوالي بحث او نظرونه شریک کړل.
د ایران اسلامي جمهوریت سفیر ایران ته د کانونو او پټرولیم وزارت کفیل او د پالیسۍ او برنامو د مرستیال وروستي سفر ته په اشارې سره، د دواړو هېوادونو ترمنځ د تخنیکي همکاریو د کمېټې په چوکاټ کې د شویو هوکړو په اړه خبرې وکړې او په افغانستان کې یې د عملي فعالیتونو د پیل غوښتنه وکړه.
د پالیسۍ او برنامو مرستیال د ایران اسلامي جمهوریت سفیر ته ښه راغلاست ووایه او د ګډو همکاریو له دوام څخه یې هرکلی وکړ او ډاډ یې ورکړ، چې د کانونو او پټرولیم وزارت به د شویو هوکړو د پلي کېدو او د دوه اړخیزو همکاریو پرمخ بیولو برخو کې اړینې همکارۍ ترسره کړي.
