د کانونو او پټرولیم وزارت د رهبري هیئت غونډه تر سره شوه.
د رهبري هیئت غونډه د کانونو او پټرولیم سرپرست وزير شېخ الحدیث شهاب الدین دلاور تر مشرۍ لاندې د معینانو او رئیسانو په ګډون نن پنجشنبه 14/7/1401 نېټې د یاد وزارت د غونډو په تالار کې تر سره شوه.
په پېل کې د یاد وزارت سرپرست وزیر د غونډې حاضرینو ته د ښه راغلاست تر څنګ د کانونو د قانوني او غیري قانوني استخراج، د هیواد اقتصادي ودې او د بامیان ولایت د جلمش سیمې د انټیموني کانونو د استخراج په اړه خبرې وکړې.
همدارنګه د وزارت د مشرتابه هیئت له لوري د بامیانو ولایت د جلمش د کانونو سیمې د لیدنې او سروې لپاره اته کسیزه هیئت وټاکل شو تر څو د یادې سیمې راپور د وزارت مقام ته وړاندې کړي.
په پای کې یو شمېر رئیسانو د رهبري هیئت غونډې ته د خپلو فعالیتونو او دندو راپور ورکړ.
