د کانونو او پټرولیم وزارت تخنیکي پلاوي د تخار ولایت له کاني سیمو څخه لیدنه وکړه
د کانونو او پټرولیم وزارت د کوچنیو کانونو د پلي کېدو رئیس انجنیر ګل محمد برهان په مشرۍ چې د تخار ولایت د کانونو رئیس مولوي علم خان مبارز او د وزارت تخنیکي ټیم یې ملتیا کوله یاد ولایت ته د خپل رسمي سفر په ترڅ کې د بېلابېلو ولسوالیو له کاني سیمو لیدنه وکړه.
دغه راز یې د خپل سفر پر مهال د رستاق، قلعه ینګي، درقد، خواجه غار ولسوالیو ولسوالانو، کاني سیمو د استخباراتو مدیرانو، امنیه قومندانانو، د عوایدو مسوولینو، د قراردادي شرکتونو استازو او د سیمه ییزو مشرانو سره لیدنې او ګډې ناستې ترسره کړې.
په دې ناستو کې د کانونو د استخراج په برخه کې روڼتیا، د قانوني تړونونو پلي کېدل، د عوایدو د راټولولو، د اسلامي امارت د پالیسۍ د پلي کېدو په اړه هراړخیزې خبرې او سپارښتنې وشوې.
یاد پلاوي د هر شرکت له کاني سیمې تخنیکي ارزونه وکړه، او د کانونو د تثبیت لپاره شاوخوا (۲۰۰) بلاکونه سکېچ شول تر څو له قانوني لارې يې تړونونه وشي.
