د کانونو او پټرولیم وزارت او د اسټرلیا د فورتسکیو میټل کمپنۍ د تخنیکي ټیمونو ترمنځ لومړۍ ناسته ترسره شوه
د کانونو او پټرولیم وزارت سرپرست محمد هارون چخانسوري، د اسټرالیا فورتسکیو میټل ګروپ کمپنۍ له غړو سره د ویډیو کنفرانس له لارې خبرې وکړې. پدې ویډیو کنفرانس کې چې د افغانستان د سرمايهګذارۍ د تسهيل د واحد رئيس ښاغلي عطاءنصيب هم ګډون درلود، د کانونو او پټرولیم وزارت او د اسټرالیا فورتسکیو میټل ګروپ کمپنۍ تخنیکي ټيمونو ترمینځ د چارو د ښې همغږۍ او د تخنیکي معلوماتو پر وخت د شریکولو په اړه بحث او خبرې وشوې.
د کانونو او پټرولیم وزارت سرپرست محمد هارون چخانسوري وویل: د افغانستان د استخراجي صنایعو په سکتور کې د فورتسکیو کمپنۍ لېوالتیا د افغانستان او د اسټرلیا هېوادونو ترمنځ د اړیکو د لا پیاوړتیا او د افغانستان له طبیعي زېرمو څخه د اغېزناکې ګټه اخیستنې لپاره یو ښه فرصت دی.
د کانونو او پټرولیم وزارت سرپرست زیاته کړه چې د ښې همغږۍ په موخه به د دغه وزارت تخنیکي ټیم له یادې کمپنۍ سره د پر وخت معلوماتو د شریکولو لپاره له نږدې کار کوي.
د افغانستان د حکومت او د فورتسکیو میټل کمپنۍ ترمنځ د لاسلیک شوي تفاهم لیک په اساس به یاده کمپنۍ په مختلفو برخو کې د پانګونې سربېره د تخنیکي ظرفیتونو په لوړولو کې مرسته کوي.
