د کانونو او پټرولیم سرپرست وزیر شیخ الحدیث شهاب الدین دلاور نن یکشنبه د پاکستان له سفیر منصور احمد خان سره په خپل کاري دفتر کې وکتل.
په دغه ناسته کې د کانونو او پټرولیم سرپرست وزیر وویل، ۴۳ کاله افغانستان یو ملي حاکمیت نه درلود، له څو لسیزو راپدیخوا لومړی ځل افغانستان د یو واحد حکومت درلودونکی دی چې په ټول هیواد پوره حاکمیت لري.
شیخ صاحب زیاته کړه افغانستان د معدنیاتو په برخه کې یو بډایه هیواد ګڼل کیږي، نو په دې اساس د معدنیاتو په را ایستلو کې د سیمې هیوادونو سره د ملي منافعو په رڼا کې تعامل ته چمتو یو.
د پاکستان سفیر د کانونو او پټرولیم وزارت له مشرتابه څخه د مننې تر څنګ د کانونو د سکتور په برخه کې په همکارۍ او پرمختګ خبرې وکړې او د کانونو د استخراج په تخنیکي برخه کې یې د بورسونو ژمنه وکړه، همدارنګه یې پاکستان ته د افغانانو د تګ راتګ په اسانتیاوو او لا ډیرو همکاریو ډاډ ورکړ.
په پای کې ښاغلي وزیر د پاکستان له سفیر څخه د مننې تر څنګ د لا ډیرو همکاریو هیله څرګنده کړه.
