د کابل نړیوال نندارتون کې د کانونو او پټرولیم وزارت سرپرست ګډون
د کانونو او پټرولیم وزارت سرپرست شیخ الحدیث شهاب الدین دلاور د پنجشنې په ورځ 21/2/1402 نېټې د کابل نړیوال نندارتون په پرانیست غونډه کې په داسې حال کې چې د د ریاست الوزراء اقتصادي مرستیال ملا عبدالغني برادر، د کابینې یو شمېر وزیرانو او ملي او نړیوالو پانګوالو شتون درلوده ګدون وکړ.
د کانونو او پټروليم وزارت سرپرست د دغه نندارتون د جوړيدو قدرداني وکړه او د دغه شان نندارتونونو جوړول يې د هېواد د سوداګرۍ او اقتصادي ودې لپاره مهم وبلل او ويې ويل: د شکر ځای ده چې موږ يو ځل بيا په يو مهم نندارتون کې ګډون کوم، خپلو هیوادوالو ته ځانګړې روحیه او د مظلوم ولس لپاره ډاډ ورکوو چې افغانستان یو زراعتي او صنعتي هیواد ده، الحمدالله د طبیعي زیرمو څخه بډای دی او په زحمت او زیار سره به انشاالله په ځان بسیا هیواد ولرو.
د کانونو او پټرولیم وزارت سرپرست همدارنګه د تړونونو د لاسلیک، د عوایدو او د افغانستان د کانونو په ځانګړي ډول د اوسپنې، سرب او جست، سمنټ، ډبرو سکرو او نورو کانونو په اړه ګډونوالو ته معلومات وړاندې کړل.
په پای کې یې د نندارتون له غرفو، تولیداتو او د داخلي محصولاتو څخه لیدنه وکړه.