د ټاپي پروژې عملې چارې پیل شوې
ټاپي پروژه د ترکمنستان، افغانستان، پاکستان او هند ترمنځ د ګازو نل لیکې ګډه پروژه ده، چې د مرکزي آسیا څخه جنوبي آسیا ته طبیعي ګاز رسوي، ددغې پروژې تړون په لومړي ځل په ١٩٩٧ کال کې د وخت اسلامي امارت د بهرنیو چارو وزیر مولوي وکیل احمد متوکل او د ترکمنستان د بهرنیو چارو پخواني وزیر بوریس شیخ مرادوف سره تړون لاسلیک شوی وو.
خو د ځینو ستونزو له کبله ددغې پروژې کارونه وځنډېدل، دا ځلې له اوږده ځنډ څخه وروسته د کانونو او پټرولیم وزارت د مشر تابه په زیاتو هلو ځلو سره د افغانستان د اسلامي امارت د ریاست الوزرا الحاج ملا محمد حسن آخند او د ترکمنستان ملي رهبر قربان قلي بردي محمدوف له لوري د یادې پروژې عملي چارې پیل شوې.
د یادونې وړ ده، چې د ټاپي پروژې په پیل سره به د اړوندو هېوادونو د انرژۍ اړتیاوې پوره شي او د اقتصادي پرمختګ په برخه کې به د نل لیکې په اوږدو کې د کار موندنې فرصتونه رامنځته شي او ګډې اقتصادي همکارۍ به پیاوړې شي، دغه راز به د سیمه ییز ثبات او سیمې هېوادونو تر منځ همکاري او سوداګري زیاته شي او افغانستان به د ګازو تر څنګ د ترانزیټ له درکه په کلني ډول زیات عواید تر لاسه کړي.
