د ټاپي پروژې د چارو بهیر څخه لیدنه ترسره شوه
د افغانستان اسلامي امارت د بهرنیو چارو وزارت سرپرست مولوي امیرخان متقي، د کانونو او پټرولیم وزارت ستر سلاکار انجنیر وحیدالله حلیمي او د ترکمنستان د بهرنیو چارو وزیر رشید مردوف او مل پلاوي ګډې پولې ته څېرمه دافغانستان خاوره کې د ټاپي پروژې د رغنیزو چارو څخه لیدنه ترسره کړه.
په دې کتنه کې یې د ټاپي پروژې د رغنیزو چارو او نورو بېلا بېلو برخو څخه د لیدنې په ترڅ کې د چارو پر چټکتیا ټینګار وکړ او یاده پروژه یې د ګډو هېوادونو لپاره ګټوره وبلله.
د یادونې وړ ده چې د افغانستان په خاوره کې د ټاپي نللیکې رغنیزې چارې د 2024 کال د ډسمبر میاشتې په لومړۍ نېټه پیل شوې او تر دا مهاله د افغانستان-ترکمنستان له ګډ سرحد څخه د هرات ګذرې ولسوالۍ په لور څه باندې ۱ کیلو مټر نللیکه وېلډینګ او غځول شوې، ۴ کیلو مټره ځمکه هواره شوې او د اړتیا وړ تجهیزات او نللیکې ساحې ته لېږدول شوې دي.
