د هایدروکاربن د مقررې په ترتیبولو سره به ددغه سکتور حقوقي چارچوب بشپړ شي
د کانونو او پټرولیم وزارت سرپرست محمد هارون چخانسوری د نړېوال بانک له استازو سره د ویډیوکنفرانس له لارې د هایدروکاربن (نفت او ګازو) د سکتور د مقررې په اړه خبرې وکړې.
په دې ویډیوکنفرانس کې د هایدروکاربن د سکتور د پراختیا او په پروژو کې د سرعت سربیره د هایدروکاربن د مقررې د ترتیبولو په اړه هراړخیز بحث وشو.
د هایدروکاربن د مقررې په ترتیبولو سره به په سکتور کې د پانګونې په بهیر کې اسانتیاوې رامنځته شي او د پروژو د سم مدیریت لپاره به ښه زمینه مساعده شي.
د یادونې وړ ده چې د هایدروکاربن ( نفت او ګازو ) د مقررې په ترتیبولو سره به د هایدروکاربن د سکتور حقوقي چارچوب بشپړ شي او د افغانستان حکومت ژمنې چې په جینیوا کنفرانس، له نړیوال بانک او د فساد سره د مبارزې په ستراتیژۍ کې ترسره کړي، عملي شي.
