د مس عینک له کان څخه د اسلامي امارت لوړپوړي پلاوي لیدنه!

د ریاست الوزراء اقتصادي مرستیال او د اقتصادي کمیسیون رئیس ملا عبدلغني برادر، د کانونو او پټرولیم وزارت سرپرست شېخ الحدیث شهاب الدین دلاور، د صنعت او تجارت وزارت سرپرست بدرالدین عزیزي، د اقتصاد وزارت سرپرست قاري دین محمد حنیف، د مخابراتو وزارت سرپرست مولوي نجیب الله حقاني، د افغانستان اسلامي امارت د چارو ادارې عمومي ریاست رئیس شېخ الحدیث نورالحق انور او د کانونو او پټرولیم وزارت د پلان او پالیسۍ مرستیال شېخ ضیاءالرحمن الاریوبي، د مالي او اداري مرستیال مولوي حسام الدین صابري د جمعې په ورځ د 4/9/1401 نېټې د لوګر ولایت مس عینک له کان څخه لیدنه وکړه.
په دغه لیدنه کې دوی د مس عینک د کان له بېلابېلو سیمو او له تاریخي اثارو څخه لیدنه وکړه. او د مس عینک کان د عملي کار د پیل په اړه یې د چینايي شرکت له پلاوي سره خبرې وکړې.
د ریاست الوزراء اقتصادي مرستیال او د اقتصادي کمیسیون رئیس وویل: چې د مس عینک کان استخراج لپاره باید لا زیات کار وشي او همدارنګه د کان  استخراج په بهير کې له لرغونو اثارو څخه ساتنه وشي تر څو تاريخي اثارو ته زيان ونه رسيږي.
ورپسې بیا د کانونو او پټرولیم وزارت سرپرست وویل: د اوسني وضعیت لپاره د مس عینک پروژې باندې د کار د پېل ښه فرصت دی او همدارنګه د افغانستان کانونو باندې د پانګونې ښه وخت دی څو دغه هیواد له اقتصادي بحران څخه وژغوري او اقتصادي ودې او پرمختګ لامل وشي.