د افغانستان د استخراجي صنایعو د روڼتیا نوښت سازمان، د پلان جوړونې دوه ورځینی ورکشاپ ترسره شو
د څو اړخیزه ډلې (MSG) غړو په هرات ولایت کې د افغانستان د استخراجي صنایعو د روڼتیا نوښت سازمان لپاره د پلان جوړونې په موخه دوه ورځینی ورکشاپ ترسره کړ.
د دې ورکشاپ د پیل په مراسمو کې، د کانونو او پټرولیم وزارت د پالیسۍ او استخراجي برنامو د تسهیل معین، محمد عتیق ذکي ګډون او وینا وکړه.
محمد عتیق ذکي په خپله وینا کې وویل: "د استخراجي صنایعو د روڼتیا نوښت یوه ملي برنامه ده. هیله ده د ګډونوالو په فعالې ونډې سره له دې برنامې څخه ښې لاسته راوړنې ولرو او په راتلونکو دوه ورځو کې داسې پلانونه ترتیب کړو چې د استخراجي صنایعو د روڼتیا د نوښت نړیوال سازمان (EITI) له شرایطو او د هېواد له ملي ګټو سره برابر وي."
د دې دوه ورځیني ورکشاپ په لړ کې چې نن مازدیګر پای ته ورسېد، د افغانستان د استخراجي صنایعو د روڼتیا نوښت سازمان لپاره کاري او عملیاتي پلانونه ترتیب شول.
