کانونو او پټرولیم وزارت سرپرست د شمال ډبرو سکرو تصدۍ له رئیس سره وکتل

د کانونو او پټرولیم وزارت سرپرست شیخ الحدیث شهاب الدین دلاور نن پنجشنبه د (4/12/1401) نیټې د شمال د ډبرو سکرو تصدۍ له رئیس سره د پلان او پالیسۍ، مالي او اداري او جیولوجي سروې مرستیالانو په شتون کې په خپل کاري دفتر کې وکتل.
په دغه لیدنه کې د شمال ډبرو سکرو د موقتي اجازه نامې طرزالعمل، د ترازوګانو ستونزو حل، د نوو ترازوګانو نصبول او د ټولګټو وزارت لخوا ترتیب شوي معیارونو په اساس د ډبرو سکرو د موټرو د کنټرول په اړه د ریاستونو د لازمې همکارۍ په اړه خبرې وکړې.
د کانونو او پټرولیم وزارت سرپرست د شمال د ډبرو سکرو تصدۍ مسوولینو د نظریاتو او وړاندیزونو د اورېدو وروسته د ستونزو د حل او د کاري بهیر چټکتیا په موخه ورته لازمې لارښوونې وکړې.