د ټاپي پروژې چارې ۱۴ کیلومټره پرمخ تللي
د ټاپي ګازو نللیکې چارې دا مهال په هرات ولایت کې په چټکتیا سره روانې دي، چې تر دې دمه یې ۱۴ کیلومټره چارې بشپړې شوي دي.
د یادې پروژې په اوږدو کې د نللیکې د غځولو سربېره ودانیزې چارې هم روانې دي چې د تورغنډۍ ښارګوټي ته نږدې د سیند له پاسه د ۳۳ مټرو په اوږدوالی سره د یو پل د جوړولو چارې پیل شوي دغه راز د تورغنډۍ ښارګوټي سره د اوسېدو د یو کمپ د رغولو کار هم روان دی، چې په جوړولو سره به یې د اوسېدوځای ستونزې هوارې او اسانتیاوې به رامنځته شي.
د سیمې خلک هیله لري او خوښي څرګندوي، چې د پروژې بشپړېدو سره به د انرژۍ کمښت له منځه لاړ شي او د اقتصادي ودې په برخه کې به یو پیاوړی ګام واخیستل شي.
