ملت ته د حکومت حساب ورکولو پروګرام کې د کانونو او پټرولیم وزارت د رهبري له لوري یو کلن راپور وړاندې شو
ملت ته د حکومت حساب ورکولو پروګرام کې، چې د اسلامي امارت د اطلاعاتو او رسنیو په مرکز کې جوړ شوی وه، مالي او اداري مرستیال مولوي حسام الدین صابري، د پلان او پالیسۍ مرستیال شیخ ضیاء الرحمن الاریوبي، د مقام د دفتر عمومي رئیس الحاج محمد معراج معراج، د وزارت ویاند مفتي همایون افغان او یو شمېر رئیسانوګډون درلود، د وزارت د لاسته راوړنو او راتلونکو پلانونو راپور یې د رسنیو په شتون کې وړاندې کړ.
په پیل کې د کانونو او پټرولیم وزارت مالي او اداري مرستیال وویل: د خوښۍ ځای دی چې نن په یوه مهمه غونډه کې د کانونو او پټرولیم وزارت فعالیتونه او لاسته راوړنې د افغانستان له شریف ملت سره شریکوو هغه همدا راز زیاته کړه: د وزارت د مشرتابه په هڅو او مدیریت سره به ان شاءالله په نږدې راتلونکي کې دا هیواد د اقتصادي ودې او پرمختګ په لور رهبري کړو او له هره اړخه به په ځان بسیا شو.
ورپسې د یاد وزارت ویاند مفتي همایون افغان د دغه وزارت د فعالیتونو او لاسته راوړنو په اړه د هر اړخیز معلومات وړاندې کولو پرمهال وویل: د کانونو او پټرولیم وزارت هڅه کوي، چې د کانونو د ساتنې او ښې استفادې په برخه کې په جديت او روڼتیا سره کار وکړي او په راتلونکي کې د هغو د تطبیق په برخه کې ښه او منظم پلانونه په پام کې نیول شوي دي، د مخکینو تړونونو د مدیریت سربیره، تېرکال د کورنیو پانګوالو سره د کوچنیو کانونو 80 قراردادونه او له کورنیو او بهرنیو پانګوالو سره 13 دلوی مقیاس کانونو قراردادونه د ازادې داوطلبۍ له لارې لاسلیک شوي، د عاليقدر امیرالمومنین حفظه الله په لارښوونې د7 لويو کانونو او6 نورو کوچنيو کانونو پيسې يې د قوشتېپې کانال د تمويل او يو شمېر سړکونو او بندونو د جوړولو لپاره ځانګړې کړې دي.
همدا راز په دغه غونډه کې د مس عینک پروژې د کار او پرمختګ، د ټاپي پروژې د عملي کار د پیل د هوکړه لیک لاسلیک، د آمو دریا د تېلو حوزه کې د 21 فعالو څاګانو او د 25 څاګانو د کیندلو او بیارغونې او د نویو کانونو کشف، د کانونو د پروسس د جوازونو ویش، د قراردادونو تمدید، د قراردادونوځنډول او لغوه کول، د پنجشېر ولایت کې د زمرد استخراج او پلور د داوطلبۍ له لارې، چې تراوسه پورې څه باندې 1700 کانونو د پنجشېر ولایت په بېلا بېلو برخو کې تثبیت او سروې یې ترسره شوې او د کانونو استخراج په موخه یې 575 د زمردو مسلکي جوازونه او درې دیاقوتو جوازونه دیاد ولایت خلکو ته وېشل شوي دي، چې تر دې دمه يې 78000 قیراطه زمرد په 25 داوطلبیو کې د 5.5 میلیونه ډالرو په ارزښت پر کورنیو او بهرنیو پانګوالو پلورل شوي، چې یوازې 10 سلنه پکې د اسلامي امارت ونډه ده. همدارنګه د لویو کانونو د استخراج قراردادونه، د مالګې سکتور مدیریت، په فاریاب ولایت کې د اندخوی مالګې قرارداد، د آمودریا نفتي حوزه، په جوزجان ولایت کې د یتیم تاق د ګازوسیمې، د کټواز، هلمند او هرات نفتي حوزې، د طوطي میدان جنګل کلان او چغچي د ګازو لرونکې سیمې شامل دي. د کانونو قانون، مقررات او طرزالعملونه، پلان او پالیسۍ، د پانګوالو هڅول، د منرالونو د لومړیتوبونو طرحه او د کانونو او پټرولیم وزارت راتلونکي پلانونه یې له خلکو سره شریک کړل.
