د کانونو او پټرولیم وزارت سرپرست د ټاپي پروژې له اجرائیوي رئیس سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د ټاپې پروژې له اجرائیوي رئیس مراد امانوف، د ترکمنستان هېواد له سفیر خواجه عوضوف او مل پلاوي سره په خپل کاري دفتر کې ولیدل.
په دغه ليدنه کې د ټاپي پروژې د روانو چارو په اړه خبرې وشوې او دواړو لورو د کارونو پر چټکتیا ټینګار وکړ.
ښاغلي دلاور دا پروژه نه یواځې د افغانستان بلکې د ټولو دخیلو هېوادونو لپاره ګټوره وبلله او زیاته یې کړه چې ټول افغانان د دې سترې اقتصادي پروژې ملاتړ کوي، او اسلامي امارت په دې برخه کې هر راز همکارۍ ته چمتو دی.
د ټاپي پروژه چې د ترکمنستان هېواد ګاز د افغانستان له لارې پاکستان او هندوستان لېږدوي او په پلي کېدو سره به یې افغانستان د نورو ګټو تر څنګ په کلني ډول 400 میلیونه ډالر د ټرانزیټ له درکه ترلاسه کړي.
