د وزارت ستر سلاکار د Mumtaz Corporation کمپنۍ له استازي سره وکتل
* د کانونو او پټرولیم وزارت ستر سلاکارانجنیر وحید الله حلیمی، د مقام د دفتر عمومي رئیس الحاج معراج محمد معراج د چهارشنبه په ورځ په ۱۴۰۴/۲/۱۷ نېټه د وزارت د غونډو په تالار کې د مالیزیا هېواد د Mumtaz Corporation کمپنۍ له استازي سره وکتل.
په دې کتنه کې د یادې کمپنۍ استازي د افغانستان د بشپړ امنیت او ثبات په اړه خوښي څرګنده کړه او د دې هېواد د کانونو په ځانګړي توګه د نفتو، ګازو او سرو زرو په برخه کې د پانګونې په اړه خپله لېوالتیا څرګنده کړه. هغوی د وزارت له رهبري نه غوښتنه وکړه، چې په دې برخه کې د لازمو اسانتیاوو برابرولو په موخه ورسره همکاري وکړي.
د وزارت سترسلاکار د افغانستان د کانونو په برخه کې د پانګونې په موخه د دوی د لېوالتیا هرکلی وکړ او غوښتنه یې وکړه چې د یادې کمپنۍ متخصصینو په مرسته دې د انجینرانو ظرفیت لوړولو او د کانونو د استخراج په برخه کې د نوې ټکنالوجي څخه د ګټې اخیستنې په موخه همکاري وکړي..
