د کانونو او پټرولیم وزارت د پلان او پالیسۍ نوی مرستیال معرفي شو
شیخ الحدیث مولوي عبدالرحمن قانت د عالیقدر امیرالمؤمنین حفظه الله د حکم په اساس د کانونو او پټرولیم وزارت د پلان او پالیسۍ مرستیال په توګه د وزارت مسوولینو او کارمندانو ته په رسمي ډول معرفي شو.
غونډه چې په همدې مناسبت د دوشنبې په ورځ د ۱۴۰۳/۱۱/۲۹ نېټې د دې وزارت په تالار کې جوړه شوې وه د چارو ادارې عمومي رئیس شیخ الحدیث مولوي نورالحق انور، د کانونو او پټرولیم وزارت سرپرست الحاج ملا هدایت الله بدري او یو شمېر رئیسانو ګډون کړی و.
یاده غونډه د قرآن کریم د مبارکو ایاتونو په تلاوت سره پیل شوه.
ورپسي د چارو ادارې عمومي رئیس د کانونو او پټرولیم وزارت نوي مرستیال ته مبارکي وویله، د بدلونونو ګمارنې او مسوولینو په اړه یې خبرې وکړې ویې ویل: د اسلامي امارت د ټولو چارواکو موخه د هېواد او خلکو خدمت کول دي.
ورپسې شیخ الحدیث مولوي عبدالرحمن قانت د افغانستان اسلامي امارت د مشرتابه د باور څخه مننه وکړه او ویې ویل: " مقام یو امانت دی موږ باید د چارو پر مخ وړلو ته ځانګړې پاملرنه وکړو او په غوره طریقه یې ترسره کړو."
