جمهوررئیس غني د کانونو او پټرولیم وزارت د کړنو راپور واورېد
د افغانستان د اسلامي جمهوریت جمهوررئیس محمداشرف غني د هیواد په وزارتونو او ولایتي ادارو کې د تحرک د ایجاد په خاطر دکابینې وزیرانو او والیانو سره د خپلو کتنو لړۍ په پیل کې نن مازدیګر د کانونو او پټرولیم وزارت سرپرست او نوماند وزیر محمدهارون چخانسوري سره وکتل.
په دغه کتنه کې د کانونو او پټرولیم وزارت سرپرست او نوماند وزیر په یاد وزارت کې د لازیات تحرک، کاري فرصتونو او شفافیت د ایجاد په موخه خپل راپور، له جمهوررئیس سره شریک کړ.
د کانونو او پټرولیم وزارت سرپرست او نوماند وزیر محمدهارون چخانسوري، په خپل دغه راپور کې د رهبرۍ او همغږۍ، پالیسۍ او حقوقي چوکاټ، د وزارت د تشکیلاتو، د قېمتي او نیمه قېمتي ډبرو، د عوایدو د زیاتوالي، شته تړونونو، د کان کېندنو د قانوني کولو، د عینک مسو کان، سروې، د ننګرهار تالک، د کانونو د سترو پروژو او هایدروکاربن پروژو په اړه معلومات وړاندې کړل.
جمهوررئیس غني د یاد راپور له اورېدو وروسته په کانونو او پټرولیم وزارت کې په تېرو دوه میاشتو کې د ترسره شویو کارونو قدرداني وکړه او په دغه وزارت کې یې د لازیات تحرک د ایجاد په موخه لازمې لارښوونې وکړې.
محمدهارون چخانسوري وویل، کانونو او پټرولیم وزارت خپل حقوقي چوکاټ او لومړیتوبونه طبقه بندي کړي او ژر به یې د جمهوري ریاست عالي مقام ته راپور وړاندې کړي.
